Nei, det vert aldri for mange små jakkar!

Det gjer ikkje det. Rosa likte eg ikkje eingong i den verste prinsessealderen då eg var fire -fem.

Dårleg fargegjengjeving på nettlesaren så eg trudde garnet var meir ferskenfarga/lakseraudt.

Men fargen er eigentleg fin, og eg kler han godt. Det er innslag av fersken og lakseraudt og eg fann perlemorsknappar som eg tykte høvde.

Garnet blei kjøpt på http://www.discontinuedbrandnameyarn.com/. Det heiter Kidd silk og er DK frå Cherry tree Hill. Kvaliteten er vidunderleg: 52 % silke, 22 % merino, 18 % kidd mohair og 8 % nylon. Eg let meg riva med og sluttsummen blei over 200kroner, og dermed måtte eg betala skattar, avgifter og toll i det vide og det breide - billeg blei det slett ikkje.

Mønsteret er ei blanding av Shrug this (frå Ravelry)med holmønster nedetter. Mønsteret på kantane er henta frå Brontës mitts

Dei pulsvarmarane har eg strikkatre fire par av - fine!

Hadde bare 200 g garn og begynte derfor opp ved halsen. Auka på i raglan og la til nye vertikale holmømster etter som eg fekk fleire maskar i sidene Sidan eg aldri orkar all matten med slikt strikketøy, måtte eg juksa for å få det til å bli symmetrisk. Det blei symmetrisk nok for meg.

Tykkjer jakken blei fin. Den er deilig å ha på, også kler eg rosa, merkeleg nok. Vert fin over ein kjole til sommaren eller til smale bukser.

Haustskogsjal

Sjalet mitt er ferdig! Det er 2m langt og 35 cm breidt. Det tynt og lekkert og har nydelege fargeskift tykkjer eg. Mønsteret er Woodland shawl - eg fann det på nettsamfunnet www.ravelry.com, men det ligg ute på bloggen eg har lenka til her. Eg har strikka litt smalare enn originalen.
Garnet er eintrådig ullgarn frå http://www.ullcentrum.com/ som blei kjøpt på Garn og broderi i Göteborg. Oppskrifta er morosam og logisk. Lett å læra og ho vert ikkje keisam. Garnet var litt stivt og stikkete, men etter at det blei vaska blei det mjukt.

Måtte hengja det opp i sjalstreet mitt også då.

Rosejakken er ferdig!

Alle strikkakoner og strikkamenn veit at det er ei tid for å klyppa om du vil laga ein jakke, og det gruer vi oss gjerne til. Først må du fram med symaskinen som ikkje alltid er ein ven for oss strikkarar. Så må du sy maskinsaumar framme - to på kvar side, og klippa mellom dei.
Her er et gjort. Så brukte eg ein mykje tynnare pinne, (3,5) til å plukka opp masker der knappestolpen skal vera. Eg plukka opp ei maske for kvar omgang, og det var for mykje synte det seg, så eg minka med omlag 10 masker her (talet her er ikkje så viktig).

Jakken er ganske tung. Han fell fint, men det betyr også at han ikkje held formen så godt som ein jakke i heil ull. Eg har ikkje heilt fått den fasongen eg var ute etter. I ryggen ser du at mønsteret ikkje er heil symmetrisk, men det sjenerer ikkje meg. (Orker ikkje all den matten...). Eg har strikka fram og tilbake bak på ryggen for å gjera han høgare bak, det tykte eg blei bra.

Ferdig jakke - litt stolt! Eg har vald små perleknappar. Nedst på ermane har eg plukka opp det mellombels opplegget og teke to saman og eitt kast og så strikka nokre omgangar, for så å legge opp kanten. Då får eg ein slik fin taggekant. Jakken blei ikkje heilt slik eg drøymde om . Litt lang, han sit ikkje godt nok, men han er fin og veldig behageleg på. Har komponert mønsteret heilt sjølv, og skal prøva å skriva det ned på eit vis.

Fargane er harmoniske og det er framleis vakker glans i garnet. Må vel vera nøgd då?

Rosejakka har fått kappe

Har fått kappe nede på rosejakka. Tok opp det midlertidige opplegget, strikka nokre omgangar to rett to vrang med mindre pinnar (3,5). Bytte til pinne fem, la ut ei maske midt mellom to rette (aukte kvar tredje maske) strikka glattstrikk 7 cm. Avslutta med tre omgangar to rett to vrang.

Det skumle, skumle blir nå å sy to saumar med maskin framme på jakka for så å klippa opp. Og då bør det vera fint.

Har tenkt å laga kappar på ermane også. Og så må eg spekulera litt omkrig knappestolpar og den slags.

Rosejakken i fleire stadier og litt skogsjal

Rosejakken kan prøvast, og det blir han. Rundfelling på måfå er slett ikkje så lett. Skal eg slutta her? (Det var det eg endte opp med)

Eller slutta her? Denne versjonen blei for lang frå ermet blei strikka på og oppover til halsen, og alt for vid. Måtte rekkja opp øvste roserekkja, og strikka ein liten kant her med tynnare pinne. Garnet har ein viss tyngde også, og det må takast omsyn til. Nedst på jakken har eg skifta til tynnare pinnar igjen, og strikka nokre omgangar vrangbord før eg har gått tilbake til pinne nr 5. Eg skal auka nokre maskar og ha ein slags volang nedst på jakken, slik at eg understreker den litt feminine fasongen.

Woodland sjal/skjerfet mitt er 115 cm nå og eg har 35 g garn att. Verkeleg gildt å strikka med slike fargeskift. Eg går inn i ein grøn fase nå, og endå lenger inne vert det meir gult att. Framleis eit kjekt og sutalaust mønster.

Rosejakken og litt til

Rosejakken begynn å ta form. Eg noterer etterkvart og skal vel prøva å laga meg ei slags oppskrift. ermane er nå komne på bolen og eg har begynt med rundfellinga. Ikkje heilt lett å få rosemønsteret til å stemma her, men så er eg ein person som trivst med det litt uregelmessige, halvskeive.
Prøvde jakken, og eg trur den kjem til å passa fint!
Då ermane var 42 cm lange og hadde eit masketal på eit par og femti sette eg seks masker under kvart erme på ein tråd, sette seks maskar i kvar side av bolen på tråd, og strikka ein omgang slik : Strikk halve forstykket. Ta saman siste maske på forstykkket med første maske på ermet, strikk erememaskane, ta saman siste maske på ermet med første på førstykket. Strikk bakstykket. Ta saman siste maske på bakstykket med første på ermet. Strikk ermet, ta saman siste maske på ermet med første på forstykket strikk fram til midt framme.

Eg var i Göteborg i februar og oppdaga mange koseleg garnbutikkar. Dette eintrådige ullgarnet i varme sjatteringar frå Ullcentrum på Öland, fann eg i butikken Garn og broderi i ei av gågatene i Göteborg sentrum. Koseleg liten butikk med mykje fint garn.

Mønsteret eg bruker heiter Woodland shawl

Oppskrifta er gratis og finst på lenka ovanfor. Såg for meg ein haustskog med lauv i varme fargar då eg såg garnet. Trur det vert fint. Mønsteret er lett å koma inn i. Eg skal tilbringa helga i ein idrettshall med to tenåringsbarn, så eg må ha eit strikketøy som ikkje er for vanskeleg og ikkje blir for keisamt heller.

Min blå blå svalehale

Svalehalesjalet i plommetreet mitt

Ferdig med svalehale sjalet mitt. Evelyn Clarks Swallowtail som de finn gratisoppskrift på her.

Eg laga ein større versjon med nitten repetisjonar av botnmotivet og dobbel kant. Sjalet er strikka i baby-merino ull frå Gjestal i melert blåfarge. Brukte fire nøster + litt som var til overs frå før , måtte kutta ut vrangomgangen på slutten for å koma i mål . Biletet syner kor lite garn eg hadde att.

Kjekt mønster å strikka, herleg garn å strikka i

- det gleid så godt på pinnane.

Sjalet måler 2,60 x 1 m

Måtte henga det opp i plommetreet så eg fekk eit fint bilete. Plommetreet er det offisielle sjalatelieret mitt.

Her er ein detalj av mønsteret:

Minne frå åttitalet

Nokre som hugsar den børsta ulla? Litt stikkete, kløete, ugrei å strikka med og umogleg å rekkja opp?

Eg har ein overvintra pose med Shoddy frå åttitalet. Fin farge og eg hadde bruk for lue, skjerf hadde eg frå før.

Lua er moderert/tilpassa utgåve av den på omslaget av VK Vogue knitting Holiday issue som kom før jul, Bobbled tam.

Morosamt mønster å strikka. Lua blei for svær og måtte rekkjast opp ein rapport, og då hugsa eg korleis det var...
Har meir børsta ull, nokon som har tankar om kva eg skal gjera med den? Usikker på om børsta ull tovar, det er tjue prosent nylon i den.

Vogue knitting er elles blitt Designer knitting i Europa. Oppskriftene inni bladet er like, men det noko med layout, papirkvalitet og format som eg tykkjer ikkje er like fint som VK Vogue knitting var.

Heidersteikn

Har fått to heidersteikn av Reidun.

Veldig snilt og eg føler meg ganske audmjuk og litt blyg.

Bloggen min er ganske ny, eg oppdaterer ikkje så veldig ofte og eg synest ikkje eg får sving på layouten. Plassering av bilete tykkjer eg er ikkje så lett.

Alle dei eg følgjer har mykje finare bloggar enn meg, så eg må skunda meg å gje dei vidare til to av dei. Pinneguri er superaktiv og hjelpsam, det same er Grete som også er vener med meg på www.ravelry.com. De fortener desse prisane mykje meir enn meg, men det var kjekt å få dei likevel Reidun, tusen takk.

Vantast vottar i vondkalde vinter

- frys du på fingrane fagre ( fritt etter Håvamål)

Dei sa vel ikkje så mykje om vottar i Håvamål, men det var nok kalde vintrar då også.
Eg har strikka kattevottar til yndlingsmodellen min, og det kan vel tenkjast at eg låner dei inn i mellom.
Fekk nesten ikkje tatt bilete under prosessen, desse var så kjekke å strikka at det gjekk som ein draum. Mønsteret kan kjøpast her http://www.joridweb.com/butikk/butikk.html

Eg brukte svart Lanett (retting - det er svart Daletta eg har brukt - trur Lanett er litt tynnare) og kvit Sisu fordi det var nå det eg hadde i korga mi. Eg strikker ikkje veldig jamnt ser eg, men vaskar eg og dampar dei blir det vel bra.
Ser de potane på innsida av vottane? Og fiskebeina på tommelen? Slike humoristiske og sjarmerande detaljar finn de fleire av i mønstera på nettsida hennar.

Fleire kvileskjer

Ja eg strikkar ermer, to stykker til og med. Dei vert nesten like, men ikkje heilt og det er bare sjarmerande.

Medan eg tenkjer meg om, strikker eg sjal i mohairgarn og noko effektgarn crushed velvet som eg ikkje aner kvifor eg har kjøpt.

Der er vakker glans i garnet, og fargane er fine for dei som kler lilla.

Oppskrifta heiter scrwrap, og finst på http://www.norskstrikkeforum.net/ på ei side/blog der dei har samla oppskrifter.

Her fann eg linken til sjalet:

http://norskstrikkeforum.blogspot.com/2008/11/scwrap.html

Skjerfepause

Rosejakken min er eit alvorleg prosjekt. Inn i mellom må ein laga små nyttige ting som ikkje er så alvorlege. Eg har laga lue og skjerf til dotter mi. Lua er i mønsteret An unoriginal hat frå Ravelry. Morsomt mønster å strikka! Eg brukte nesten eitt nøste til lua og to til skjerfet av Rosendahl som er eit mjukt, tjukt ullgarn frå Gjestal. Litt variasjon i tjukkleiken også.

Modellen var nøgd.

Lua strikka eg på ein kveld. Til skjerfet tok eg utgangspunkt i flettemønsteret på lua. som går over 14 maskar. Eg la opp 22 maskar, brukte ein rapport av hovudmønsteret + ein ekstra glattstrikkstolpe + to maskar i kvar side som kant, dei blei strikka vrangt. og laga det i begynnelsen og slutten av skjerfet, ribbemønster i midten, tok utgangspunkt i mønsteret. Tjukke pinnar brukte eg , var det 7 eller 8?

Rosejakken min har litt for smale ermer er eg redd. Skal eg då rekka opp eller strikka dei lenger slik at dei gjerne kan vera litt smale nedst? Garnet er drygare enne eg trudde først så eg kan kanskje ha litt lengde på ermane?

Slike ting grublar ein strikkar på i dei mørke januarkveldane, ogdå er det grett å ha eit skjerf å strikka på, medan ein grublar.

Det vakraste garnet eg har

har eg begynt å strikka av nåi det nye året. Garnet heiter Laines Plassard Royal - det består av 30% silke/40% ull/30%kid mohair. dette garnet trur eg er gått ut av produksjon. Eg kjøpte det via ein annonse på Finn.
Garnet er melert, det har ein vidunderleg glans, og det er svært mjukt. Eg må strikka striper og har lagt inn eit mønster - roser sjølvsagt slik som på stasvottane mine - for å drøya det.


Håper dette bildet viser litt av glansen i garnet. Måtte bruka blitz sjølv om eg tok bildet ute -

det vert gjenskin i garnet, hadde håpt eg kunne greia meg med naturleg lys.

Eg skal strikka ein liten jakke til meg sjølv. Det vert ALDRI for mange små jakkar.

Eg har bare akkurat nok garn. derfor har eg lagt opp med provisional cast on for å kunna strikka på eventuelle kantar etterpå når eg ser kor mykje garn eg har att. Skal bruka provisional caston på ermane også av same grunn. Trur eg kjem til å bruka alt garnet, har ein del rosa melert også som eg vel ikkje er så glad i, men det vert sikkert brukbart saman. Eg skal ha rundfelling på berestykket. Jakken skal vera litt svingt, litt kroppsnær. Eg har strikka prøvelapp og lagt opp i forhold til det. Prøvelappen blei sjølvsagt feil...Men eg trur det blir bra nå. Legg inn litt aukingar framme på jakken for å få endå litt meir fasong.

oppskrift så langt:

Har lagt opp 124 masker på pinne nr 5 (fire masker skal klyppast når dette vert jakke. strikka 15 cm. aukt 6 m midt på kvart framstykke over tre omgangar på siste omgang la eg til ein maske på kvar side, totalt 138 maskar.

Når eg har strikka litt lenger set eg nokre maskar på tråd i kvar side, og så får eg begynna på ermane.

Hadde eg hatt mykje garn trur eg det hadde vore fint å strikka litt struktur med dette garnet, fletter og sånn:).

Har hatt dette garnet sidan september, men har mest gått rundt i ærefrykt. Håper veldig dette prosjektet vert vellukka.